Eitt af sérkennum Íslands er gríðarleg fjölbreytnin í landslagi og náttúrundrum

Stærsti hluti landsins eru óbyggðir hálendisins, jöklarnir, hraunbreiðurnar og sandarnir og fyrir vikið njótum við þess að keyra á milli landshluta eftir hringveginum.

Suðurland

Það er engin tilviljun að Suðurland er fjölfarnasta svæði ferðamanna á Íslandi. Það er sneisafullt af heimsfrægum náttúruperlum sem toppa stöðugt hver aðra. Hér er að finna stórstjörnur á borð við Gullfoss, Geysi, Skaftafell og Jökulsárlón. En hér er líka að finna annars konar stórfenglegt landslag á borð við Skeiðarársand, útsýnið undir jöklunum og eitt gróðursælasta svæði landsins. Dagur 1-3: Reykjavík, Gullni Hringurinn, Skaftafell, Jökulsárlón

Austurland

Að keyra suðausturhornið er eins og að ferðast úr landi álfanna yfir í land tröllanna. Austurland og Vestfirðir eru elstu jarðsvæði landsins og einhvern veginn bera Austfirðirnir það með sér að hafa verið lengur á svæðinu. Dramatísk fjöllin sem tróna yfir sjarmerandi smábæjunum skilja engan eftir ósnortinn enda eru þorpin hér bæði einstök og gullfalleg. Austurland og Norðurland mætast svo á Möðrudals- og Mývatnsöræfum þar sem land virðist enn ónumið og auðvelt að upplifa sig landkönnuð á framandi plánetu í þessu stórbrotna landslagi. Dagur 4-5: Austfirðir, Seyðisfjörður, Egilsstaðir, Borgarfjörður Eystri

Norðurland

Norðurland er ríkt af sinni eigin sögu og menningu en það á líka sínar óviðjafnanlegu náttúruperlur. Ber þar helst að nefna jarðhitasvæðið við Mývatn þar sem stórbrotið landslagið virðist búa yfir annars konar birtu og Dettifoss sem býður upp á einhverja mögnuðustu nærveru sem völ er á. En hér er líka að finna Eurovision-bæinn Húsavík, höfuðborg norðursins Akureyri og ógleymanlega fjallasýn. Dagur 5-6: Dettifoss, Mývatn, Goðafoss, Husavík, Akureyri

Vesturland

Vesturland tengir Akureyri og Reykjavík en virðist líka bjóða upp á úrval allra landshluta þegar kemur að náttúruperlum og landslagi. Hér er að finna dramatíska fjallvegi, hraunbreiður, jökla, úthaf og blómleg bú í hverri beygju. Hápunktar hér eru tvímælalaust hinn einstaki Deildartunguhver og töfrandi Hraunfossar. Ferðinni lýkur svo með akstri aftur út á Keflavíkurflugvöll um einstakt Reykjanesið. Dagur 7-8: Deildartunguhver, Hraunfossar, Flugrútan frá hóteli